Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Tāhia

Kāinga Ngā Whanaketanga Rumaki Māori Ngā Whanaketanga Rumaki Māori me Ka Hikitia – Accelerating Success 2013–2017

Ngā Whanaketanga Rumaki Māori me Ka Hikitia – Accelerating Success 2013–2017

Te Ahunga Whakamua – Te whakakore i Ngā Whanaketanga Rumaki Māori

HE KŌRERO MĀ NGĀ KURA ME NGĀ KAIAKO

 

E ngā mana, e ngā reo, e ngā mātāwaka o te motu, tēnei te mihi atu ki a koutou katoa.

Ka mahi tahi Te Tāhuhu o te Mātauranga ki te rāngai, ki ngā mātua, ki ngā whānau ki te whakakore i Ngā Whanaketanga Rumaki Māori. Tō mātou hiahia kia arotahi ki te whakahohoro i te ahunga whakamua o te tamariki i āna akoranga, tutukinga hoki, puta noa i te marautanga whānui, engari ka maumahara tonu he mea taketake tonu te reo matatini me te pāngarau. Me mātua ako te tamariki ki te kōrero, ki te pānui, ki te tuhituhi me ngā pūkenga pāngarau hei urutomo ki tētahi marautanga whānui, whai kiko hoki.

Mō te roanga ake o ngā kōrero tīkina ake te pānui i raro iho nei. 

He mea waihanga, he mea whakatinana Ngā Whanaketanga Rumaki Māori hei wāhanga nō tētahi kaupapa rahi ake e whai ana kia pakari ake te huarahi rapu mātauranga ko te reo Māori te reo kawe i ngā mahi.

E rima ngā kaupapa whāiti e whakahaeretia ana e Te Tāhuhu hei whakakaha ake i te huarahi nei, ko te whakatinana i Ngā Whanaketanga Rumaki Māori tētahi. Koia nei aua kaupapa whāiti:

  • te tautoko i te whakatinanatanga o Te Marautanga o Aotearoa
  • te waihanga, te whakatinana i Ngā Whanaketanga Rumaki Māori
  • te mahi kia mārama, kia māmā te reo o ngā pūrongo ki ngā mātua
  • te tiriwā i ngā ngoikoretanga o roto i ngā rauemi aromatawai i te reo, i te pāngarau i roto i ngā kura rumaki
  • te whakatakoto kaupapa whakapakari tuawhiti tonu mā ngā pouako, ngā tumuaki, ngā poari whakahaere, e anga nui ana ki ngā hiahia o te rāngai mātauranga rumaki reo Māori.

He tautoko nui tā ēnei kaupapa e rima i te arotahinga mātauranga reo Māori o roto i Ka Hikitia - Accelerating Success 2013-2017.

Ka Hikitia - Accelerating Success 2013-2017 

Ko Ka Hikitia - Accelerating Success 2013-2017 tērā e tohu ana i te ahunga e pai ake ai ngā hua mātauranga e puta ana ki ngā ākonga Māori. Ko te tikanga o te Ka Hikitia i konei, ko te ‘hāpainga’, ko te ‘aranga ake’, ko tōna whāinga, kia puta ngā ihu o ngāi Māori mā i te ao mātauranga i runga anō i tā rātou tū, hei Māori.

He upane nui Ngā Whanaketanga Rumaki Māori taha kōrero, taha pānui, taha tuhituhi, taha pāngarau, e kake ai tēnā me tēnā ākonga ki te tihi e tika ana mōna. 

I runga i Ngā Whanaketanga Rumaki Māori:

  • ka whakaaturia ngā pae e tika ana kia ekea e te ākonga i te kōrero, i te pānui, i te tuhituhi, i te pāngarau anō hoki, puta noa i ngā tau 1 ki te 8 i te kura
  • ka whakaaturia te kauneke haere o te ākonga ki te pae o Ngā Whanaketanga Rumaki Māori e tika ana mōna, he aha anō hoki ngā mea hei ako māna i muri tata ake
  • ka tautokona ngā kura kāore e tino eke ana, kāore rānei e tino kauneke atu ana ā rātou ākonga ki ngā pae o Ngā Whanaketanga Rumaki Māori e tika ana
  • ka takoto he pūrongo ki ngā whānau kia mārama, kia māmā anō te reo, e kōrero ana mō ngā mea kua tutuki, kia tutuki rānei i ā rātou tamariki.

Me he ākonga kāore e tino eke ana ki te pae e tika ana mōna, ka wawe te kitea o tēnei e te pouako, e te ākonga tonu, e te whānau anō. Me te aha, kua tere tonu te tahuri ki te āwhina i taua ākonga kia ekea ai te taumata. 

Ka whāia e ngā pouako ngā pārongo aromatawai papai tonu hei ine i ngā mea kua tutuki i te ākonga, hei whakamōhio i te whānau, hei whakatakoto anō i ētahi rautaki mō ngā mahi kia mahia ā taihoa ake. 

Ko te tikanga ka horaina anō e ngā poari whakahaere ngā kōrero ki ō rātou hapori mō te whanake haere o ā rātou ākonga i te kura. Mā konei ka mōhio ake ngā whānau ki ngā mea e tika ana kia mōhio rātou, ka kaha ake anō hoki tā rātou uru mai ki te kaupapa. 

Toro atu ki a Ka Hikitia - Accelerating Success 2013-2017 mō te roanga atu o ngā kōrero mō te rautaki hou.


Footer: