Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Tāhia

Kāinga Ngā Whanaketanga Rumaki Māori Te Hoahoa i Ngā Whanaketanga Rumaki Māori

Te Hoahoa i Ngā Whanaketanga Rumaki Māori

 

Huia Feb12 (30)

 

Ko Te Marautanga o Aotearoa e tohu ana i ngā hua whānui, i te ahunga whānui mō te ara ako kia takahia e te ākonga. Ko Ngā Whanaketanga Rumaki Māori e whakaatu ana i ētahi ‘tohuara’ mō tēnā, mō tēnā taumata marautanga. He tohu ēnei hei ārahi i te whakaako, i te ako, me te aromatawai. 

Te āhua o Ngā Whanaketanga Rumaki Māori

E whakaahua ana Ngā Whanaketanga Rumaki Māori i ngā pūkenga me ngā mātauranga taha kōrero, taha pānui, taha tuhituhi, taha pāngarau anō hoki, me mau i ngā ākonga o ngā tau 1-8 e tika ai tā rātou ako i ērā atu wāhanga ako katoa o Te Marautanga o Aotearoa.

Ko Te Marautanga o Aotearoa e tohu ana i ngā hua whānui, i te ahunga whānui mō te ara ako kia takahia e te ākonga. Ko Ngā Whanaketanga Rumaki Māori e whakaatu ana i ētahi ‘tohuara’ mō tēnā, mō tēnā taumata marautanga. He tohu ēnei hei ārahi i te whakaako, i te ako, me te aromatawai. 

Kei roto anō i Ngā Whanaketanga Rumaki Māori ētahi tauaromahi, mei kore e mārama ake te tikanga o tēnei mea te kounga, kia takoto noa anō ētahi tauira whāiti hei āwhina i te pouako.

He mea tārai Ngā Whanaketanga Rumaki Māori hei whakapiki ake i ngā ākonga katoa, tae atu ki ērā ākonga mā tētahi momo tautoko tāpiri e ako ai.

Kei Ngā Whanaketanga Rumaki Māori e tohua ana ngā mea e tika ana kia tutuki i ngā ākonga i te reo me te pāngarau, i tēnā, i tēnā takahanga o te ara rapu mātauranga i te kura.

E tika ana kia mōhio ngā ākonga kei hea ake rātou e haere ana, e pēhea ana te pai o tā rātou ako, ā, he aha anō ngā mea ka mahia e ngā pouako me te whānau hei āwhina i a rātou. 

Ka aromatawaia e te pouako te whanake haere o te ākonga i runga anō i te āhua o Ngā Whanaketanga Rumaki Māori, me te maha o ngā tikanga aromatawai, i ōna wā anō o te tau. Mā konei e mōhio ai te ākonga he aha te mea hei ako māna i ngā rā tata kei mua i te aroaro. Ka mōhio anō ngā pouako, ngā mātua, me ngā whānau he aha tā rātou hei tautoko, hei whakawhānui ake i tāna ako. 

Ka kawea tonutia e ngā pouako ngā tikanga aromatawai o mua, engari me te kīnaki ki ō rātou mōhio ngaiotanga.

Te āhua o te tārainga me te whakatinanatanga

Kua roa ake Ngā Whanaketanga Rumaki Māori e tāraia ana i ngā paerewa Ingarihi, i te mea he nui ake ngā pārongo e tika ana kia kohia hei tūāpapa. Waihoki, nā te matahuhua o te rāngai rumaki reo Māori, ka uaua ake te tārainga me te whakatinanatanga o Ngā Whanaketanga Rumaki Māori.

He wāhanga Ngā Whanaketanga Rumaki Māori nō tētahi kaupapa whānui ake e kōkiritia ana hei whakapakari ake i ngā ara rapu mātauranga ko te reo Māori te reo kawe i ngā mahi. Anei ētahi atu wāhanga o taua kaupapa whānui:

  • kia tautokona te marautanga
  • kia takoto he pūrongo ki ngā whānau e mārama ana, e māmā ana te reo
  • kia pakari ake, kia maha ake ngā tikanga me ngā rauemi aromatawai – taha reo, taha pāngarau
  • kia takoto he kaupapa whakapakari mā ngā tumuaki, ngā pouako me ngā poari.

Ka oti Te Marautanga o Aotearoa te whakatinana atu i te tau 2011. I whakaputa whakaaro ngā kura i whāwhā i te tauira hukihuki o Ngā Whanaketanga Rumaki Māori i te tau 2010. He āwhina tā tērā i te whakaritenga o ngā taumata marautanga e tika ana, mō ngā wāhanga ako katoa. He āwhina anō ki te whakatakoto i ngā tikanga aromatawai e tautokona tonutia ai ngā pouako. 

I whakaputaina Ngā Whanaketanga Rumaki Māori hou i te Hakihea 2010, ā, ka whakatinanatia i roto i ngā kura me ngā akomanga rumaki katoa, i te taha o Te Marautanga o Aotearoa, atu i te Huitanguru 2011.


Footer: