Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Tāhia

Kāinga Ngā Whanaketanga Rumaki Māori Te Marautanga o Aotearoa

Te Marautanga o Aotearoa

 

He tautoko tonu tā Ngā Whanaketanga Rumaki Māori i te whakatinanatanga o te marautanga, inā hoki, ka āwhinatia ngā pouako ki te poipoi i ngā pūkenga me ngā mātauranga o ngā ākonga ki te kōrero, te pānui, te tuhituhi, me te pāngarau, e taea ai e rātou ngā wāhanga ako katoa o te marautanga.

Te Whakatinanatanga o Te Marautanga o Aotearoa

I ngā tau e rua ka taha, kua aro nui ngā kura me ngā akomanga rumaki ki te whakatinana i Te Marautanga o Aotearoa. Nō te tau 2010 i tutuki ai. Atu i te Huitanguru 2011, ka āta whakatinanatia e rātou ā rātou marautanga ā-iwi, i te taha anō o Ngā Whanaketanga Rumaki Māori.

He tautoko tonu tā Ngā Whanaketanga Rumaki Māori i te whakatinanatanga o te marautanga, inā hoki, ka āwhinatia ngā pouako ki te poipoi i ngā pūkenga me ngā mātauranga o ngā ākonga ki te kōrero, te pānui, te tuhituhi, me te pāngarau, e taea ai e rātou ngā wāhanga ako katoa o te marautanga.

Mā Ngā Whanaketanga Rumaki Māori, ka takoto he whāinga ako mārama tonu mā ngā pouako, tae atu ki ngā pārongo mārama tonu mō te kauneke haere a ngā ākonga. Ko ēnei pārongo hei ārahi i te pouako ki te whiriwhiri me aha ia hei tautoko i te ako a ngā ākonga.

E haere tonu ai te tautoko a Te Tāhuhu i ngā pouako ki te hāpai i Te Marautanga o Aotearoa me Ngā Whanaketanga Rumaki Māori, kua tuhia ētahi kōrero hei arataki i te pouako. I ēnei aratohu, ka tohua ngā pae ako e whakaahua ana i te kauneke o te ākonga me ngā mea e tutuki ana i a ia, e whakamārama ana anō hoki i te hononga o ngā pae ki ngā taumata o te marautanga.

Te tautoko a Ngā Whanaketanga Rumaki Māori i Te Marautanga o Aotearoa

Ko te kōrero, te pānui, te tuhituhi me te pāngarau – koia nei te tūāpapa ako o Te Marautanga o Aotearoa. Mā ēnei hanga e whā e ea ai ngā whāinga whānui o te marautanga.

Ko te kōrero, te pānui, te tuhituhi, me te pāngarau kei te pū o ngā momo ako katoa o te marautanga. Mā te pouako te ākonga e āwhina ki te ako:

  • i ngā kupu whāiti o tēnā, o tēnā wāhanga ako
  • ki te pānui, ki te kimi māramatanga i ngā tuhituhi o ia wāhanga ako
  • ki te whakaputa i ōna whakaaro, i ōna mātauranga i runga anō i te tika
  • ki te whakarongo, ki te pānui arohaehae i ngā kōrero.

Ko te mātau ki te pāngarau, ko te āhei ki te āta whakamahi i te pāngarau i runga i te māia, ahakoa i te kāinga, i te mahi, i te hapori rānei.

Ngā Whanaketanga Rumaki Māori i roto i ngā wāhanga ako o Te Marautanga o Aotearoa

Me whakaako atu ngā pūkenga kōrero, pānui, tuhituhi, me te pāngarau ki ngā ākonga i roto anō i ngā horopaki e whai tikanga ana, e whaihua ana ki a rātou. Kei ngā wāhanga ako ēnei horopaki hei tiki atu mā te pouako, e pai ai tāna whakaako i ēnei āhuatanga matua e whā.

Ahakoa kei hea ake o Te Marautanga o Aotearoa ngā ākonga e haere ana, kua pai te nanao atu a te pouako i Ngā Whanaketanga Rumaki Māori, kia āta tautohua ai te kōrero, te pānui, te tuhituhi, me te pāngarau i roto i ngā mahi ako katoa.

Ngā Whanaketanga Rumaki Māori me te whakatinanatanga o Te Marautanga o Aotearoa

He wāhi nui kei te pouako hei poipoi i te ākonga kia ekea ai e ia Ngā Whanaketanga Rumaki Māori mō te kōrero, te pānui, te tuhituhi, me te pāngarau. Ina koa, mā te pouako:

  • e takoto ai he taiao hei tautoko i te ako
  • e akiaki te ākonga kia huritao ōna whakaaro me ana mahi
  • e kitea māriretia ai te hāngai o ngā akoranga hou (e mōhio ai te ākonga he aha tāna e ako ana, he aha ngā mea kia tutuki i a ia, he aha i noho ai koirā te mea hei ako māna, ā, me pēhea tana whakamahi i ngā mea hou ka ākona)
  • e poipoi te ako ngātahi, e matapaki ai, e wero ai, e tautoko ai, e whakahoki kōrero mai ai ngā ākonga katoa me ō rātou hapori 
  • e tuitui atu ngā mea hou ki ngā mea kua ākona kētia, kua whāwhātia kētia e te ākonga
  • e hora te maha o ngā huarahi ako e tika ana, e whakaharatau ai, e pakari ake ai ngā ākonga, ā, e whakawhitia ai ngā mea hou e ākona ana 
  • e āta uiui te hononga whakaako-ako, me te whakamahi i ngā taunakitanga o te kaha uru mai o te ākonga ki ngā mahi, me āna tutukitanga, hei ārahi i ana whakatau mō ngā mea o roto i te marautanga kia kōwhiria, me pēhea anō te whakaako i aua mea.

Ko te ākonga ka uru pai, ka mārama pai, ka ngākaunui anō ki tāna e ako ana, ka whakapono ko ia tonu e whakataki ana i ngā mea e ako ana ia. Ā, i tērā tonu, ka kaha ake pea tāna mahi, ka nui ake ngā mea e tutuki i a ia. E tika ana kia uaratia ngā pūkenga me ngā mātauranga kōrero, pānui, tuhituhi, me te pāngarau; mā ēnei hanga e pai ai te ako i te huhua noa o ngā horopaki e hāngai ana. 

Kia takoto i ngā kura ā rātou ake marautanga ā-kura me te whai i te Te Marautanga o Aotearoa, me whiriwhiri anō e rātou me pēhea e tautohua ai e ia pouako ngā huarahi ako me ngā pīkaunga ako mō te kōrero, te pānui, te tuhituhi me te pāngarau i ia wāhanga ako, ā, i te whānuitanga atu o ngā kaupapa kawea ai i te kura.


Footer: