[Te Huarahi]
Kei ngā manu taupua o te wao o ako, areare taringa mai mō te manu pīkari nei, mō Revere McGregor. Ko tāna he pēhi, he patu i ngā pātene o te pūrere oro nei. Koia te mahi ko te patuoro, te mahi e pārekareka nei, e kōingo nei ki tōna ngākau.
[Revere]
Ko Taranaki te iwi
Ko Ngā Mahanga a Tairi te hapū
Ko Puniho te marae
Ko Revere McGregor ahau
[Te Huarahi]
He pūnaha kawe kaupapa patu oro ka whāia e Revere. Māku tērā pūnaha me ōna wāhanga matua e whakaatu, e whakamahuki hoki.
- Te urupare, te whakatau tono
- Te mahi whakatairanga
- Te kohikohi waiata
- Te whakawai
- Te whakarite rawa
- Te hua
[Anahera]
E whā pea ngā wā kua tū a Revere hei kaipatuoro i ngā tau kua hori nei, tīmata mai i te kura o Kairanga, te kura anō hoki o Awatapu, ā, ngā mākete o te pō ki te taone. Ka haere tahi rāua ko tana pāpā.
[Anahera]
Te nuinga o te wā ka tae mai ngā tono i tana pāpā. Ka ringi atu tētahi me te kī, ‘Kei te rapu mātou i tētahi kaipatuoro’. Ka whakaaro ake, ‘tērā pea ka taea e Revere tēnei āhuatanga te kawe’.
[Te Huarahi]
Te mahi whakatairanga - Ka noho tahi a Revere rāua ko tana pāpā ki te hanga pānui whakatairanga i te ngahau kei te haere.
[Anahera]
Ka noho atu mō te āhua whā haora ki te whakaraupapa i ngā waiata. Me mātua mōhio a Revere he aha ngā momo waiata e tika ai mō ia pō kanikani i te mea, ētahi o ngā waiata kāore pea i te pai mō ngā nohinohi, mō ngā tamariki. Tērā pea he kangakanga, he aha atu rānei, me muku i ērā kupu.
[Te Huarahi]
Te whakawai - Mutu ana te kohikohi waiata ka noho a Revere ki te whakawai i te rere, te hono me te hāngai o te kohinga waiata kua whakaritea.
[Te Huarahi]
Te whakarite rawa - I a Revere ka whakarite ki te haere atu ki te mahi patuoro me āta whakarite, me āta uta hoki ia i ngā rawa puoro e tika ana.
[Te Huarahi]
Te hua - He ngahau te hua o tā Revere whakamahiti korou!
[Te Huarahi]
E mihi ana ki a koe e tama mōu i whakatauira i tū a te rangatira. Kia ū i roto i āu mahi e koro e.
