Kua puta ki te whai ao, ki te ao mārama ako ai

Ko tā Te Marautanga o Aotearoa he kawe i Te Kura Kaupapa Māori o Te Rotoiti ki te taiao ako ai.

Kua roa tō mātou kura e ako mārika ana i roto i ngā akomanga. Koirā te wāhi ako ā te kura māhita me te ākonga i mua i te mea kāre i whakaaengia kia puta mātou ki waho ako ai ahakoa ko te taiao te akomanga o ngā tūpuna mai rā anō. Nā whai anō kua rerekē ngā mahi ako ā ngā kura māhita me ngā ākonga i te putanga mai o Te Marautanga o Aotearoa i roto i tō mātou kura.  I nāianei ko te taiao te akomanga hou kia tino mārama ai ngā ākonga ki ngā āhuatanga o te taiao whānui.  ‘Ko au ko koe, ko koe ko au.’

Ko te marae te akomanga o ngā akomanga mō ā mātou ākonga, ā, ki konā rātou tau ai i ngā wā katoa.  Ka tino akiaki mātou i ngā ākonga kia tae ā-tinana rātou ki ngā pōwhiri, hui me ngā tangihanga i te mea koirā te wā ka tino kitea ngā kawa me ngā tikanga.  Koinā hoki te wā ka rongo ai te mita o ngā kōeke.  Waimarie katoa mātou he tini marae kai ngā tahataha o tō mātou tupuna roto.  Nā whai anō ka ngana mātou kia tino mātau ai ngā ākonga ki ia marae me ōna kōrero.  I puta tēnei akoranga i roto i tētahi pātere i akohia e mātou.  Inā mau i a mātou te pātere nei i taki haere mātou huri rauna i te roto, i whai i ngā tapuwae o ngā tūpuna.  Koirā te tino akomanga mō ēnei momo akoranga.  He mea nui kia rūmakingia ngā ākonga ki te wairua o ngā mahi akoranga.

Ko te mana whenua me te mana moana ētahi tino taonga ki ngā tamariki me te hapori whānui.  Nā reira kāre he akomanga i tū atu i te taiao.  Ko te mana whenua te huarahi tautoko i tēnei mea te kaitiaktanga mō ā mātou tamariki.  Ko te oranga o tō mātou roto tētahi uara whai mana.  Ko tā tō mātou kura he whakatō i tēnei uarā, te kaitiakitanga, ki roto i tēnā tamaiti, i tēnā tamaiti kia tū rātou hei kaitiaki ā ngā tau kai te heke mai. 

E tautokohia ana tēnei kaupapa e EBOP, te Kaunihera o Rotorua, Te Arawa Lakes Trust rātou ko Kauri Park.  Waimarie katoa i whiria mātou hei kura ārahi ki te waihanga i ētahi rauemi mō ngā Ngae rerewa i roto i te reo Māori.

Kei te akiaki hoki mātou i ngā tamariki kia tū rātou hei kaitiaki o te taiao tuku rua me te mahi māra.  Kei te whakatipu i ō mātou ake huawhenua pēnei i te rētihi, kāpiti, kāpiti poura, porokari, rīwai, kānga me ngā pīni. 

Kua whakatōngia he māra putiputi hoki. Nā wai rā ka tū motuhake ā-huawhenua nei ā ngā tau kei te heke mai.  Ko te pae tawhiti o te kura kia taea e ngā ākonga te kawe i ēnei pūkenga mai i te kura ki te kāinga ki konā whakatō ai, whakahoki ai rānei te mahi ā ō tātou tūpuna arā te mahi māra hei oranga mō te whānau.  Mā tēnei mahi ka tino whai hua, whai oranga hoki hei oranga mō Ngāti Pikiao whānui.

I ahau e tū ana hei tumuaki mō te kura nei kāre āku āwangawanga ki te akiaki, ki te poipoi i ngā kura māhita kia puta ai rātou ki waho mai i te tapawhā whakahono atu i ngā mahi ako ki te taiao mā Te Marautanga o Aotearoa.  Ko ngā hua ka taka mai i ngā mahi ako i waho mai o te akomanga he tini, ā, kāre i kitea i ngā tau ngāhuru kua hipa.