Te Kura o Titahi ki te Raki

Ko Whitireia te maunga

Ko Parirua me Te Moana o Raukawa ngā awa

Ko Tainui te waka

Ko Takapūwāhia te marae

Ko Ngāti Toa Rangatira te iwi

Ko Te Kura o Titahi ki te Raki te kura

Ko Te Whānau o Te Kākano te hapū

Tihei mauri ora!

Kei te whanga o Titahi, ki Porirua tō mātou kura e tū ana. Ahakoa he kura auraki, he whānau rumaki reo tonu tā mātou, ko te ingoa, ko Te Whānau o Te Kākano. I whakatūhia Te Whānau o Te Kākano hei ara mā ngā kōhungahunga e puta ana i te kōhanga reo. I mua rā kāore hoki he kura hei whakawhanake i te reo Māori.

I ngā tau e rua kua pahure ake i tīmata ai mātou ki te waihanga i te āhua o ā tātou ākonga. He nui ngā mahi i oti i a mātou ki te kohi whakaaro mai i te whānau me te hapori e pā ana ki ō rātou hiahia mō ā rātou tamariki. Ko tētahi o aua mahi, ko te tuku i te pātai nei, arā, “he aha ngā mātāpono me ngā uarā me mārama ā tātou tamariki?” Ko ētahi o ngā whakaaro i hoki mai ko te kaitiakitanga, te manaakitanga, te whanaungatanga, me ngā mahi a te Rēhia, heoi anō ko te hiahia nui tonu ko te reo Māori me ōna tikanga.

I roto i te wetewete kohinga kōrero i puta ko Te Whare Tapawhā hei anga pupuri, hei anga whakamārama i ēnei whakaaro katoa, arā, ko te taha wairua, ko te taha hinengaro, ko te taha tinana me te taha whānau.

I tēnei wā kei te āta wānanga mātou i ngā tapa o te whare nei kia hōhonu ake te māramatanga. Kātahi, ka tirohia ngā mahi o te akomanga me te whakahāngai i aua mahi ki ngā tapa o te whare. Hei tauira, i ia ata mahi ai ngā tamariki i te karakia, ā, ko tā te hunga kaiako mahi, he āta titiro ki tēnei mahi, me te whakaaro ake, ka noho ngā wāhanga o te karakia ki ēhea tapa o te whare?  

Tērā anō tētahi mahi a ngā tamariki, arā, ko te tito pao. Mā te wetewete i te kaupapa, te whakaraupapa whakaaro me te kōtuitui kupu, e hōhonu ake ai te puna mārama a ngā tamariki ki ngā āhuatanga o te whare tapa whā nei. He paku wāhanga tēnei o tētahi pao e kōrero ana mō te taha tinana. 

Whakaute ngā tinana katoa e,

ahakoa ko wai nō wai koe,

tiaki ngā tinana me whakaute e,

He taonga te tinana e,

Ai 

Ko te ara kōkiri whakamua i tēnei wā ko te āta wānanga he aha rawa te kiko o ia taha o te whare me tōna hāngaitanga ki ngā mahi o te akomanga, ka tahi. Ka rua, ka titiro ngā kaiako ki ngā āhutanga ako me te whakaaro ake, me pēhea ēnei e tautoko ake i tō mātou whare tapa whā. Ka toru, ka kimi whakaaro mai i te whānau me te hapori kia mōhio ai mēnā rā e hāngai tonu ana ngā mahi ki ō rātou hiahia mō ā rātou tamariki. Mā reira e torotika ai te tū o tō mātou whare.