E kore a repo ki te kore a rauropi

E kore a repo ki te kore a rauropi.

E kī ana tēnei whakataukī ka noho ngātahi ngā otaota, ngā kararehe me ngā ngārara katoa ki te repo.

I tapaina tēnei ingoa Ngā Mana Kākano o te Wairepo ki ngā akomanga reorua nei nā tētehi wai i rere tata nei ki te kura i mua. Nā taua wai i whai oranga te whenua, ngā momo kararehe me te iwi i mua i tōna putanga atu ki Te Aorere.

Kia mōhio mai te whānau he mana kei taua kākano ā he mana anō kei ngā tamariki.  Kei te whāiatia ngā tamariki i ngā tapuwae o ā rātou tūpuna ā nō rātou nō tuawhakarere tēnei mea te mātauranga.

Ko ngā ingoa o ngā akomanga o Ngā Mana Kākano o te Wairepo nō ngā rākau Māori ka tipu ake i te repo.  Ko Harakeke, ko Raupō, ko Toetoe ko Korimako, ko Kiekie, ko Tī Kōuka hoki.

Ka noho ngātahi ngā mea katoa o te taiao, mā tērā whanaungatanga ka whai oranga te taiao.  Me pēnei anō tērā whanaungatanga kei Ngā Mana Kākano o te Wairepo kei te Kura Tuatahi o Wikitoria.

He mana, he hua, he oranga kei te repo kei te wai o Te Wairepo.  Kei ngā tamariki hoki ēnā taonga ahakoa he rerekē o rātou pūkenga me o rātou pūmanawa.  Mā te tiaki i te hinengaro, i te wairua, i te tinana me o rātou tumanako mātauranga ka noho tau te ākonga ki waenganui i tōna whānau me ōna hoa.

Kei te repo tēnei mea ko te whanaungatanga.  He mea nui ko ngā mātāpono o te whanaungatanga me te manaakitanga kei Ngā Mana Kākano o te Wairepo.  Nō te taiao ka tauiratia tēnei mea ko te manaakitanga ki waenga i ngā rauropi. Nā te whanaungatanga ki waenganui i ngā ākonga, i ngā mātua, i ngā whānau me ngā kaiako o te kura ka poipoia ka akiakitia ngā ākonga kia eke taumata.

Ka rere Te Wairepo ka whāngai, ka horoi, ka miringi te wai ki tō mātou kura kia tau mai Ngā Mana Kākano o te Wairepo hei kura taiao.  Ka noho ngātahi hoki te taha auraki o Te Kura o Wikitoria me te wāhanga Māori.  Ko tō mātou ko te whakī atu o mātou hiahia o te wāhanga Māori kia mōhio mai te katoa o te kura.  Kātahi ko te poipoi i ngā kākano ki tēnei taiao ki tēnei kura ka taea e rātou te whakatipu pakari ai.

Rite ki te rere o te wai, mai i Te Wairepo puta atu ki Te Aorere ki taku tai moana, tērā hoki te rere o ngā ākonga mai i te Kura o Wikitoria ki Aotearoa puta ki te ao whānui, kia tutuki o rātou wawata tumanako i ngā tau kei mua o rātou aroaro.

E kore e hekeheke, he kākano rangatira.  Ka kore rawa e ngaro, he hekenga rangatira.

Pāwhirihia ki raro iho nei mō ngā tuhituhinga o tēnei kōrero