[Wawaro]
Kei ngā manu pākiki o tēnā pito, o tēnā pito o te motu, tau mai anō ki tēnei hōtaka, ki Ringa Auaha.
Kia areare taringa mai ki ngā kōrero mō te ringa mākohakoha nei, mō Karangawai Marsh. He pūnaha raranga ka whāia e Karangawai. Māku tērā pūnaha me ōna wāhanga matua e whakaatu, e whakamahuki hoki.
- Te kohikohi whakaaro
- Te whakarite rawa
- Te hanga
- Te whakakite, te koha
[Karangawai]
Ko Karangawai ahau.
Ki te taha o Pāpā, ko Tainui te waka, ko Koromiko te puke, ko Mangatea, ko Mangaōkewa ngā manga, ko Ngāti Maniapoto te iwi, ko Parekaitini te hapū.
Ki te taha o Māmā, ko Tainui te waka, ko Tararua maunga, ko Ōtaki te awa, ko Te Pou-o-Tainui te marae, ko Ngāti Raukawa ki te Tonga te iwi, ko Kapu-manawa-whiti te hapū.
I a au e tamariki ana, i kaha manaaki ahau e ngā kuia me ōku whāea, ā, engari, ko tētahi o aku tino whaea, tino kaitautoko i roto i ngā mahi harakeke ko te tuakana o taku māmā, ko Whaea Tangiwai Doctor. Ka kaha haere māua tahi ki ngā hui raranga, hui whatu kākahu, i reira tūtaki i a Tina Wirihana, i a Matekino Lawless, rātou katoa ngā kanohi raranga o Te Waiariki. Ana ko ētahi hoki ka piri mai.
I ētahi wā ko te whakaaro te mea tuatahi, kātahi ka haere atu ki te whakarite i ngā whenu, i ngā aho mehemea he mahi whatu. Ā, i ētahi wā ko te haere atu te mahi tuatahi kātahi ka puta te whakaaro i a koe e kato harakeke ana, i a koe e whakarite ana i ngā whenu, ngā aho, ngā aha atu rānei. Āe, nō reira ko te mahi tuatahi, i ētahi wā koia te mahi tuarua; i ētahi wā ko te mahi tuarua, koia te mahi tuatahi.
I ētahi wā ka kite tētahi rawa, he rāpihi ki tā te tirohanga ā ētahi atu, engari, ki te karu o te hunga mahi toi, he aho, he whenu, he aha atu rānei hei hanga taonga.
Ko ētahi atu rawa o wēnei rā, o ngā rā o ngā tūpuna, ko te wūru; ko te tūte, ko te jute; ana, kei te whakamahia tonutia i ēnei rangi. Ko te rino, ko te kirihou.
Nā, i mua i taku hūnukutanga mai ki Te Papaiōea, ka haere atu au ki te pā harakeke ki Te Kuiti, ana, koirā ngā harakeke i kaha whakamahia e ōku kuia, e ōku tūpuna. Nā, i au i reira ka puta noa mai ngā tupu, ana, kātahi au ka tiki atu ka mau mai ki Te Papaiōea. Kua waru, haurua me te waru tau tēnei e tipu ana.
[Mō te mahi] kākahu, mō te mahi i tētahi mahi whatu, ko te mahi tuatahi he kato, he kato harakeke, ko te whakarite i ngā whenu, ko te miro, ā, mehemea, ki te hiahia kia karakara ngā whenu, he wāhanga anō tērā o te mahi. Ko te whakarite i ngā aho kia tino whāiti nei. Ko te whakarite i ngā huruhuru me ērā atu whakarākeitanga koirā ngā mahi whakarite. Kia mutu tērā wāhanga, koia te wāhanga matua rawa, koia te wāhanga roa, ka e hia marama pea e tatari ana, e mahi ana i aua mahi whakarite kātahi ka āhei ki te whatu. Ana, ko te mahi whatu, koia te mahi māmā, te mahi āhua poto me kī.
Ana, ka tīmata ki te aho tapu, koia te whatu tuatahi o tō korowai, ana, ki tā te kōrero, mehemea kua tika rawa atu te aho tapu ana, koia te ara e mea ana ka pai te haere o ērā atu kaupapa e haere tonu mai ana. Ana, ko te rārangi, me kī, koia te kaupapa o tō korowai. E hia nei ngā rārangi ki tō korowai, koirā ngā kaupapa o tō korowai.
Ki au nei, mēnā e tino mārama ana koe, ina e tino mōhio ana koe ki āu mahi me tōna Māoritanga, ana, koia hei tūāpapa mō āu mahi ahakoa he aha te rawa e whakamahia ana. Ana, ko tō wairua Māori ka kuhu noa atu.
