He Reo Mōteatea – Tirohanga whānui

He Tirohanga Whānui 

Ko te kaupapa whānui o ēnei kōwae ako ko ngā mōteatea – ‘Pōpō!’, ‘Ka Eke ki Wairaka’, ‘Tirotiro Kau Au’ – me te haka taparahi, ‘Rūaumoko. 

E aro ana tēnā kōwae me tēnā kōwae ki tētahi (ki ētahi rānei) o ngā taumata (1 ki te 4) o Te Marautanga o Aotearoa. Kua tuhia ngā kōwae ako ki tō te Māori titiro, he ako ā-kaupapa te āhuatanga, ka whakawhiti hoki i te maha o ngā wāhanga ako. Heoi anō, kua kōwhiria kia ākina te reo ā-waha i roto i te akomanga – e rua, e rua ko te reo ōpaki me te reo ōkawa. 

Puta noa i ngā kōwae ako ko ngā hononga ki ngā rauemi kua tāngia kētia tae noa ki ngā pāpāho, ipurangi hoki. Whakahoungia, hurihia rānei ngā kōwae ako kia pai ake ai mā koutou ko ō ākonga. He tirohanga whānui hei tīmatanga mō ia kōwae ako e whakahāngai ana i ngā ngohe ki ngā wāhanga ako o te Marautanga. He ariā āheinga aromatawai hoki puta noa i ngā kōwae ako.

Ngā Kaupapa
Pōpō Ko te oriori nei, ko Pōpō!, te arotahinga o ēnei kōwae ako. He hononga ōna ki te Reo Māori, ngā Tikanga ā-Iwi, te Hangarau me Ngā Toi, ā, e hāpai ana i ngā mahi whakaako me ngā mahi ako i ngā taumata 1-4 o Te Marautanga o Aotearoa.
Rūaumoko Ko te haka taparahi nei, a Rūaumoko, hei arotahinga mō ngā mahi ako e whakaahuatia ana i konei. He hononga ō ngā mahi nei ki te Reo Māori, ngā Tikanga ā-Iwi, te Hangarau me Ngā Toi, ā, e hāpai ana i ngā mahi whakaako, ako i ngā taumata 1-2 o Te Marautanga o Aotearoa.
Ka Eke ki Wairaka Ko te arotahinga o tēnei kōwae ako, ko ētahi o ngā kaupapa ka ara ake i te waiata aroha Ka Eke ki Wairaka. He mea tuhi hei tautoko i ngā mahi whakaako me ngā mahi ako i te taumata 3-4 o Te Marautanga o Aotearoa.
Tirotiro Kau Au  Ko te waiata tangi nei a Kararaina Anaru te pūtake o ngā mahi kei tēnei kōwae ako. He hononga anō kei Te Reo Māori, ngā Tikanga ā-Iwi me Ngā Toi. Kua āta tuhia hei tautoko i ngā mahi whakaako, ako i te Taumata 2–3 o Te Marautanga o Aotearoa.