Ka taea te noho tahi a TMoA me NZC?

Ko Te Arawaru tētahi o ngā kāhui akomanga reorua nui rawa o te motu i Aotearoa nei. E ono ngā akomanga, mai i te tau tuatahi tae atu ki te tau tuaono. I tīmata te reoruatanga i te kura nei i te tau 1995.

I te tau 1999 i tapaina  te ingoa o Te Arawaru ki ngā akomanga. He ingoa nō Rangitāne, a, he ingoa o tētahi o ngā mata o te pae maunga a Tararua.

Ko Shelley Black te kaiako matua, nāna te rōpū i ārahi.  Ko Jonella Smith te kaiako nāna te kaupapa o Te Marautanga o Aotearoa i whakatairanga kia tika ngā mahi mō ngā ākonga.

Ko te tumuaki o te kura nei, ko Shona Dalton.  Ka kōrerotia e ia ngā piki me ngā heke kia noho tahi ai  te New Zealand Curriculum me Te Marautanga o Aotearoa. Ahakoa āhua 120 ngā tamariki kei te Te Arawaru,  tokomaha anō kei te wāhanga auraki o te kura.  Kore rawa ia e pīrangi kia noho wehe ngā wāhanga, ngā ahurea e rua. Ki roto i te pakiwaitara rokiroki nei ka kitea te ngana o ngā kaiako kia piri tata te whānau whānui o Te Arawaru me ngā kaiako hoki kia whakatinanahia ngā moehewa o te katoa.

Hei whakamaumaharatanga me mihi ka tika ki tētahi o ngā kaikōrero o te whakaaturanga nei a Julie Hikaka-Liddy i hinga i te tau 2012. Nā reira e Julie, e rere koe i te rere a te raukura kia purea e ngā hau a Tāwhirimātea.