Te whakaako me te ako

Whakawhanake ana i ngā rauemi aromatawai

I te whakawhanaketanga o Ngā Whanaketanga Rumaki Māori i te mōhiotia kia nui ake ngā rauemi aromatawai tika mō ngā kura me ngā whare rumaki reo Māori. Mā te pēnei ka puta he taunaki tino kounga kia tika te aromatawai i te pakari haeretanga me te whakatutukitanga o te ākonga.

Ka tautoko a Mātaiako i te whanaketanga o ngā rauemi aromatawai e pono ana, e tika ana me ngā āhuatanga hei whakaniko i te whakaako me te ako i ngā kura me ngā whare rumaki reo Māori.

Ka arotahi atu tēnei whakawhanaketanga ki ngā wāhanga mahi maha:

• Te whakatū i tētahi uepū aromatawai rumaki Māori

Ka whakatū i tētahi uepū aromatawai rumaki Māori i te hauwhā tuatahi o 2012, ā, ko tā rātou he āta tirotiro i te kounga o ngā rauemi aromatawai katoa kia kitea ai:

• he rauemi tika mō ngā kura me ngā whare rumaki reo Māori;
• he rauemi whaimana ki tā Te Marautanga o Aotearoa e arataki ai; 
• he rauemi tika hei pūrongo ki tā Ngā Whanaketanga Rumaki Māori e kī ai.
• Te whakarārangi i ngā rauemi aromatawai mō ngā kura me ngā whare rumaki reo Māori

I oti te whakarārangi i ngā rauemi aromatawai ākonga i te marama o Whiringa-ā-rangi 2011 kia mōhio ai ko ēhea rauemi aromatawai i whakawhanake ā-rohetia ai e ngā kura me ngā whare rumaki reo Māori. 

Mutu ana, neke atu i te toru tekau ngā rauemi aromatawai i whakawhanakehia, ā, ko te nuinga he mea whakahāngai ā-rohe, he mea whakahou rānei mai i ngā rauemi ā-motu.  Nā te whakahokinga kōrero i kitea ai kāore ngā kaiako i ngā kura me ngā whare rumaki reo Māori i te hiahia ki ētahi anō rauemi aromatawai engari i te hiahia kē kia mōhio me pēhea e whakamahi i ngā rauemi aromatawai kua puta kē mai.

Ka tātarihia ēnei rauemi aromatawai kia kitea ko ēhea e tino tika ana mā ngā kura me ngā whare rumaki reo Māori.  Hei te marama o Paengawhāwhā 2012 tēnei mahi tīmata ai.

• Whakahāngai ana i ngā rauemi aromatawai

Ko ngā rauemi aromatawai, ērā e tino tika ana mā ngā kura me ngā whare rumaki reo Māori ka whakahāngai, whakahou rānei e taea ai te whakamahi hei tuhi pūrongo mō te pakari haeretanga o ngā ākonga ki tā Ngā Whanaketanga Rumaki Māori. Hei te haurua tuatahi o 2012 tēnei mahi tīmata ai. 

• Raua atu ngā rauemi aromatawai ki te ipurangi

I te tīmatanga o 2012, ka tautohu, ka arotake hoki i ngā rauemi aromatawai hou, ngā mea hoki nō ēnei wā e āhei ai te whakamahi i te hangarau matihiko hou. Mā ēnei ka kaha ake te taha aromatawai o te kaiako, ngā ākonga, ngā mātua me ngā whānau, ā, ka nui ake te whai wāhi o ngā mātua ki te ako o ā rātou tamariki.

• Arotake me te whakahoutanga o e-asTTle

I te huarua tuatahi o 2012 ka tīmata te aromatawai i te pai, kore pai rānei o e-asTTle mā ngā kura me ngā whare rumaki reo Māori. Ka whakahoki kōrero mō ngā whakahoutanga, whakarerekētanga rānei me mahi pea kia pai ake a e-asTTle ki te mātauranga Māori.

Ka whakahou ake hoki ētahi o ngā wāhanga o e-asTTle kia hāngai ki āianei kia tōtika hoki.