Ngā Kōrero ā-Waha i Hoki mai

I te tau 2011, ka whakatinanatia Ngā Whanaketanga Rumaki Māori e ngā kura rumaki e whai ana iTe Marautanga o Aotearoa mō ngā ākonga kei ngā tau 1 ki te 8. E whakaahuatia ana e aua whanaketanga ngā pūkenga me ngā mātauranga taha pāngarau, taha reo e tika ana kia mau i ngā ākonga i tēnā takahanga, i tēnā takahanga o te ara rapu mātauranga i te kura.  

Mai i te Poutūterangi ki te Haratua 2010, ka hui tahi, ka whiriwhiri tahi Te Tāhuhu ki te rāngai rumaki reo Māori, ki ngā mātua me ngā whānau, huri i te motu.  I ēnei hui ka kimihia ngā whakaaro o tēnei hunga mō te kaha mārama o ngā kōrero o te tauira hukihuki o Ngā Whanaketanga Rumaki Māori, o te rere ngātahi o Ngā Whanaketanga Rumaki Māori me Te Marautanga o Aotearoa, ā, mehemea i tika te wāhi e rewa ana tēnā me tēnā whanaketanga. I uiuia anō ngā mātua me ngā whānau he aha te huarahi pai e whakamōhiotia atu ai rātou ki te tipu haere o te tamaiti, ā, me pēhea te āwhina i a rātou ki te tautoko i te ako a te tamaiti.

I whakakaohia e Te Tāhuhu ngā whakaaro i puta ā-waha i te rāngai me ngā mātua i tae ake ki ngā hui whiriwhiri me ngā wānanga. I whakakaongia anō ngā whakautu i tuhia i ngā rārangi pātai i tāia me ērā i whakairia ki te ipurangi. Ko te whakarāpopototanga e whai ake nei, nō roto i ngā whakaaro i whakapuakina ā-waha. 

Te whakarāpopototanga o ngā kōrero i puta

• E kī ana te nuinga o te rāngai, ngā mātua me ngā whānau he mea pai te whakatinanatanga o Ngā Whanaketanga Rumaki Māori mō ngā ākonga, ngā whānau me ngā kura rumaki reo Māori.

• E hiahia ana ngā mātua me ngā whānau kia whai wāhi rātou ki ngā mahi rapu mātauranga a ngā tamariki, hei āwhina i a rātou ki te ako. Ā, e pai mai ana rātou ki te whakaaro kia hui tahi rātou ki ngā pouako ki te kōrerorero i te whanake haere o ā rātou tamariki.

• I tohu mai anō te rāngai me takoto he kaupapa whakapakari tuawhiti tonu hei tautoko i a ia ki te hāpai i Ngā Whanaketanga Rumaki Māori.

• I kaha te tautoko mai i te rere ngātahi o Ngā Whanaketanga Rumaki Māori me Te Marautanga o Aotearoa.

• Ko tētahi whakaaro i puta i ētahi, me wānanga tonu te rere ngātahi o Ngā Whanaketanga Rumaki Māori me Ngā Kete Kōrero, kia tautika ai ngā taumata, ā, kia tika ai ngā kōrero e tāpaea ana ki ngā mātua me ngā whānau mō te ako me te tipu o ā rātou tamariki.

• Ko tētahi atu kōrero i puta ake, ka uaua pea ki ētahi kura te tuhi pūrongo kia mārama, kia māmā te reo.  Me mārama pai te katoa he aha tēnei mea, te reo mārama, te reo māmā, ā, me pēhea te whakamāmā i ngā kupu me ngā ariā uaua.

• Arā anō te whakaaro me āta kōrero tahi ngā pouako me ngā kura ki ngā mātua me ngā whānau, kia mārama ai rātou ki ngā kōrero ka takoto ki ngā pūrongo mō ngā tamariki.

• I pātaihia anō te pātai, me reo Pākehā, me reo Māori rānei ngā pūrongo. Ko te āwangawanga o ētahi, ka uaua te whakatakoto i ngā kōrero kia mārama tonu ngā mātua me ngā whānau mehemea he iti tō rātou mōhio ki te reo Māori. 

Kei konei te roanga atu o te pūrongo mō ngā whakaaro i puta i ngā hui whiriwhiri i Ngā Whanaketanga Rumaki Māori.